November 2022 kwam dur een mail met de vroage of wulle, Tone Brouwer en ik, ut zaag’n zitt’n um iets te doon met een dialect cafe…
Wulle word’n uut e neudigt in ut Holstohuus um te heur’n wat ze op andere plekk’n a e doane en bereikt hadd’n op dit vlak.
Dur was van alles e doon en dur was een bulte inzet van de leu, mar de opkomst veul oaveral toch wel tegen, ut leup niet arg.
Tone en ik bedach’n det wie de stap toch ging woagen en de doatum word’n e plent, op vriejdagoamp 27 januari 2023 zol ut gebeur’n, Plat Kuieren in ut buurthuus van de Diamant van Salland.
Tone regel’n leu die dur kiek op hadd’n en die ok nog een bulte wuss’n, olde woord’n en gezegdes, zukke ding’n.
Wie zaat’n un oamp bie oons an de keukentoafel, een oamp bie Tone in de blokhutte en de Grand de Finale op donderdag vummedag bie oons in de kapel.
Tone had ut bruidspaar Littelink uut Roalte e regelt en um die oamp ordenteluk te loat’n verloop’n had e Cor van de Barg in e vleug’n.
Cor had a meer met dit bieltie e hakt en hij had oons veurzien van een bult hulpmiddel’n van de oldheidskamer van Wieje, een paar grote burd’n met woord’n, een memoryspel en nog wat dinge…
Toen Cor heur’n det wie dik aover de 40 man verwach’n, moss’n wie gauw griep’n anders had e onder de toafel e leeg’n, det hadd’n ze nog nargens e had.
De oamp zelf begun met de Elshofse inloop, onder ut genot van een komme koffie of een bakkie thee, doarna maak’n wie gruupies en kon wie of trapp’n.
Um de beurt’n deut Cor een bord met woord’n en hadd’n wulle gast optredens.
Tonny Wichink Kruut deut 2 prachtige veurdracht’n, Dinie Eikelboom heult een mooi verhaal uut ut olde Wieje, Miny Roessink heult een mooie verdracht, Wim Temmink had Tone ok nog e strikt um een stukkie te doen en ik mogge ok nog iets veurdraag’n uut eigen wark.
Tuss’ndeur een pauze met een sappie of een drankkie en op ut ende een soort van Quiz met een klein priessie, det had Tone e regelt met Vincent Jansen van de Hogeweg.
Hennie Niej’nhuus had de hoofdpries en um kwart veur elf was de oamp ten ende, wie bedank’n alles en iederene veur de komst en de medewarking an disse oamp.
Cor van de Barg mos helaas glieke vot ivm ofspraak’n, mar de rest van de leu zoch’n een plekkie op en wie hadd’n ut dur nog eem’n oaver!!
Ut bleef nog lange gezellig in oons buurthuus en Tone en ik konn’n weerrumme kiek’n op een prachtig geslaagde oamp en as alles een bettie met lup dan zult wie toekomm’n winter nog weer een oamp in mekaare zett’n.
Ut was een mooi’n oamp, daank’s weerd!!
Tone Brouwer en Jan Diekslag.