Ut leste weekend van februari en ut eerste van meert was ut weer zowiet: Toneel in de Diamant van Salland.
Festival der Fantasten….
Ut stuk zat al een poos in de piepe, mar deur een virus det rondwaarde hadd’n wulle sinds 2020 gien veurstelling meer op de plank’n e had.
Mar noe kon de toneelvereniging weer van de kante dus det gung ok voortvarend..
Er waar’n een paar verandering’n in ut team, een paar woll’n even wat kalmer an doon en wat nieje enthousiastelling’n wurd’n e vunn’n..
De repetitie’s gung’n van start en ut begin was moeizaam, ik hebbe de regeldeuze onder dak en heur nachtrust word’n dur niet positief deur be-invloed, mar op wonderbaarlukke wieze sleut de wiezer ineens umme noar de positieve kante en toen gung ut steeds better….
Alle 3 veurstelling’n waren uut verkocht en bie de leste moch ik zelf komm’n kiek’n.
Wat een onmeunig mooi stuk en wat heb wulle wat of e lach’n…
Ok heb wie een bulte bie e leert, zaagemaal is goed veur de stoelgang en likdoorns…
Oons vocabulaire is goed bie e spiekert qua liefdevolle teksten noar de wederhelft..
Olde vetspuite, rolle puntdroad, det halve portie van mie , etc etc.
De speulers deud’n ut onmeunig goed met mekaare, de dames van de varve hadd’n ze mooi op e mak, onze fluusterdeuze heult ze mooi gangs en de regeldeuze vund steeds meer rust.
De pauzes waar’n veur de versnapering’n en de verkoop van de lotties veur de verlotting.
Noa het grootse slotapplaus kwam de verlotting en ut mag e zeg word’n , een stoande ovatie veur de sponsoor’n is absoluut op zien plekke..
Wat een onmeunig mooie priez’n waar’n dur en ok een bulte priez’n.
Een woord van dank is ok op de plekke veur Frans van Dartel uut Broekland.
Bie alle 3 verlotting’n had de dochter van Monique en Rene e hulp’n en de spollers hadd’n heur de taarte uut de verlotting beloofd , as een spoller um zol winn’n……
Mar Frans wun um, mar toen e heur’n van de belofte stell’n e sportief de taarte beschikbaar…
Ok een speciale vermelding veur Tone en Petra Brouwer, wat hebt die zich onmeunig in e zet um ut decor um te transformeer’n tut timmerwarkplaatse, tut in detail was ut een timmerhok uut ut verleed’n.
Ut modarnste was de Boerinnenkalender van 2022 😊
Alles met mekaare heb wie genoot’n van alles en iedereene, ik hoope det wie in 2024 weer zo onmeunig vulle wille magt hebb’n met mekaare…
Iedereene onmeunig bedankt !!!
Jan Dijkslag